Mitterfels

Die Ministranten legten (hinter-) sinnige Geschenke in einen Korb und gratulierten in humorvollem Bairisch:

Thomas:

 A mir Ministranten mechdn eahna, liaba Herr Pfarrer, zum  Geburtsdog graduliern und hama uns denkt, a so a Koab wa genau des richtige. Gengans a moi fira zu uns.

Katharina:

Oba a so a larer Korb is a weng zweng, do denge muas no wos nei. Und wos do eitz so eine kimmt, darüber hamma uns Gedanken gmacht.

Sabrina:

Und an Pater Jakob im Windberger Klosterlodn hama dabei a no s´Lebn schwar gmacht. Lassns eana eitz überraschn, was uns dabei eigfoin is.

Simon (Haas):

Liaba Herr Pfarrer, uns is zu Ohrn kemma, dass Sie recht gern im Bayrischen Woid wandern. Desweng hama uns denkt, dass eana a Heimatkundebiachl über Bayern gfrein dad. Do drin kennans nachlesen, warum Berlin eigentlich zu Bayern kead und warum dass Papst Benedikt eigentlich koa echta Bayer is.

Matthias (Linsmeier):

Und wenn eana dann vom voin Spazierngeh d´Haxn recht weh dand, dann hamma für Sie an Schweiklberger Kräutergeist eipackt, den kenans eireim oder a dringa. Oba a genaue Anleitung dazua konn eana mit Sicherheit eana Bruada gem. Der kennd se midn Schweiglberger Kräutergeist nämlich ganz besonders guad aus.

Michaela (Wittmann):

Und wenns af d’ Nacht des Dogwerk vollbracht is und es ganz staad wird, dann is a so a Glasl weißa Sauerampfer genau des richtige. Uns is nämlich gsagd woarn, dass bei eana da weiße Wein staubdrokn sei muas und a ned recht oid wird. Damit a ned so schnei ausgäd hama eana glei vier Flaschn eine do.

Corinna (Rabenbauer):

Und fois amoi zviu vom Sauaampfa dawischt ham, dann kon eana Cilla midn Tee wieda aufpäppln. Und außerdem is des a ganz a bsonderer Tee - a Geburtsdogstee, den kenans jeds Joa am Geburtsdog dringa, der wiad nämlich ned hi.

Claudia (Lehner):

Am Sonndog und Feierdog do hama uns sogn lassn, kocht Cilla imma bsonders guad. Do kons scho amoi sa, das ma zvui Schweinas dawischt hod. Damit da Bauch ned an ganzn Dog weh tuat, bag ma eana in den Korb noch a Verdauungsschnapsal ei. Natürlich nur fia medizinische Zwecke verwenden! Oiso, Herr Pfarrer, immer nur oa Schnapserl dringa.

Steffi (Blatz):

Na, liaba Herr Pfarrer, Sie keman eitz scho in des oida wo ma in da Zeidung zuerst die Todesanzeign oschaud. Oba machens eana koa Sorgn. Mei Muada duad des a scho. Oftmois wundadt ma se do scho wos de Leid ois so eineschreim. Und so hamma uns dengt, a Zusammenstellung von die lusdigsdn Todesanzeign, „aus die Maus“, des wa wos zum Lacha - natürlich bei am Glasl Wein.

Philipp (Wirt):

Für Gsundheit bag ma eana a no wos im Korb nei: A Glasl Bütenhonig. Fois mia Ministrantn oamoi wida vui zlaud in da Sakrisdei san und sie ihre Stimm erheben miassn, dann konn eana Cilla dahoam im Geburtsdogstee an Honig eine doa, damit eana schene Stimm uns lang erhoidn bleibd, denn midn Midsinga do beists manchmoi a bissal aus. Desweng brauchma eanane kräftige Stimm, sonst wiads goa so fad.

Florian (Murer):

Und weils uns nia schimpfan, egal wos ma wida o´gschdeit ham, und weils a so a herznsguada Mensch san, den ma besonders gean meng, back ma eana in den Geburtsdogskorb no rote Gummibärle-Herzerl eine. Genau wia unsa Pater Dominik ham a sie immer a offans Herz für unsan Ministrantenhaufa. Und wemma bsonders sche ministriert ham und a bsonders schens Gsicht aufgsetzt ham und vielleicht a bisserl mehr mitgsunga ham, dann griang ma am End a Fleisboidal, meistens vom Malerpfarrer Sieger Köder, die sie extra für uns Minis kafan, geschengt.

Veronika (Groß):

Und wissens wos Herr Pfarrer, wema eana so oschaud, dann glaube derfma song, dass ma eana imma lacha segd. Mia kemma uns ned erinnern, dass sie amoi grandig dreigschaud ham. Desweng hama uns dengt, dass Sonnentaler-Kekse im Korb ned fein derfan. Mia wünschma eahna deshalb zum Geburtsdog von ganzen Herzn, dass eahna des Lacha im Lem ned vergäd und sie immer gearn bei unsam Ministrantenhaufa san.